450 Gramm Lattich

Eine heitere Mundartanekdote von Ueli Johner-Etter. Er hat in der Edition Unik sein Buch geschrieben.

We me z Märit geit, lehrt me mit dr Zyt verschiedeni Chundinne u Chunde kenne. Di Einte si komplizierter, Angeri weniger; di Einte hei gärn abwächsligsrychi Choscht, angeri si uf irgend äs Gmües oder Salat iigschosse u chöi de absolut nid begryfe we das einisch nid vorhande isch. I jedem Fau isch aber „der Kunde König“ u mir probiere di verschiedene Wünsch vo üsere Klientele ds erfüue. So e Chundin isch d Frou Mumetaler gsy. Si isch sicher fasch zwänzg Jahr lang a jedem Samstigmorge regumässig a üse Gmüesstang cho für ihre Ychouf ds tätige. D Frou Mumetaler isch e chlyneri Frou gsy mit chlyne, churze Häng, ganz äs unschynbars Pärsönli; si isch mit churze Schrittli cho derhär z loufe. Im Herbscht, Winter bis i Früelig het si e scho ziemli abtreite brune Mantu aagha, am Arm ihri auti Märittäsche mit em abgwetzte rote Portmonnai. We mer si hei gseh cho dür Strass uche loufe, hei mer scho gwüsst was sie gärn hätti… u üser Ching hei gchüschelet: „lue dört chunnt ds Lattlech“… U de isch si vor em Stang gstange, het d Uslag u Uswau gmuschteret u gseit: „dier wüss ja Herr Johner wi gäng, 450 Gramm Lattlech, aber äs chunnt nid so drufa…“

Bild: Pexels.com

Bild: Pexels.com

Sicher han i das gwüsst, u scho vorhär ä passendi Stude Lattlech i ds Oug gfasset gha. Isch einisch aber kei passends Lattlech i dere Grösse im Chischtli umewäg gsi, hets fasch äs Drama gäh; „wüsster Herr Johner mit vierhunder Gramm han i eifach nid gnu gässe u mit föifhundert äbe ging e tumme Räschte vürig…, eh lueget doch no einisch, wüsster 450 Gramm, aber äs chunnt ja nid so drufa…“ Meischtens isch es de scho gange; i ha are grössere Stude mit em Mässer unger chley abhoue oder zwüschedüre hets de für di Ässesration vor Frou Mumetaler mängisch zwö chlyneri Stüdeli brucht; oder de han i scho vorhär so äs dunkugrüens Gwächs uf dWaag gleit, derbi eis Blatt oder zwö wäggnoh das ds gwünschte Gwicht de stimmt, u ungerem Tisch parat gleit. Bim Wäge vo däm preparierte Exemplar sägen i bylöifig: „e lueget da Frou Mumetaler genau öies Gwicht…“ de het si mi aagluegt, gschtrahlet u git aus Antwort: “Jetz hei mer aber Glück gha, eigetlich wärs ja nid so drufa cho, eifach ungfähr 450 Gramm, dier wüssets ja Herr Johner.”

Usnahmswys hei mer amene Samschtig einisch eifach kei Lattlech gha; da het sech d Frou Mumetaler tatsächlech entschlosse de haut i Gottsname äs Bluemchöli z choufe; aber na dere Entscheidig isch glych no ds obligate Sprüchli derzuecho: „gäuet Herr Johner, wi gäng ungefähr 450 Gramm, aber äs chunnt ja nid so drufa…“ I ha äs pfüdigs Exemplar gwoge, dr Schnitzer gno u chley am Storze abghou u Frou Mumetaler isch glücklech gsy, we scho ke Lattlech de wenigschtens 450 Gramm… Jahre später het sie üsem Chrischtoph einisch gseit si hätti no e auti Miuchchanne im Chäuer ober mer di wetti für Sunneblueme iizsteue; si warti bi däm und däm Husnummero ar Strass. Klar hei mer das wöue u si d Strass dürab zu däm Nummero gfahre. Won i mit em Chrischtoph parkiere seit sie: „dier syt genau richtig da, hie i mym Chäuer isch di Channe, wüsst dr Herr Johner das hie isch drum my Liegeschaft…” Dr Chrischtoph u ig luege enang verdutzt a; dr Frau Mumetaler ihre Liegeschaft isch äs Nünfamiliehus wo si säuber ir schönschte Wohnig wohnt. Jetz isch das Märitgschichtli tatsächlech imene Büechli ufgschrybe. I ha drum dr Frou Mumetaler einisch gseit wen ig de myni Memoire vom Märit aufschriibi sig si de uf Syte 101 aus Frou M. erwähnt. Si het mi den gross aagluegt u gfragt: „werum grad uf dr Syte 101?“ Druf sägere mit emen Ougezwinkere: „eh ungfähr, das chunnt ja de nid so drufa, i ha nume chlei lut dänkt…“

 

Ueli Johner-Etter gibt sein Buch im Eigenverlag heraus. Es ist auch in der Papeterie Kerzers  sowie in der Altstadtbuchhandlung Murten erhältlich. Es kostet CHF 25.--, kontaktieren Sie uns, wenn Sie Interesse an einem Buch haben.